Трамп депортацияга қарши чиққанларни жаримага тортишни режалаштирмоқда
Мамлакатни тарк этмаган муҳожирлар кунига 998 АҚШ доллари миқдорида жаримига тортилади.
АҚШ президенти Доналд Трамп маъмурияти мамлакатни белгиланган муддатда тарк этмаган муҳожирларга нисбатан қатъий чораларни қўллашни режалаштирмоқда. Хабарларга кўра, депортация қарори чиқсада, АҚШни тарк этмайдиган шахслар кунига 998 АҚШ доллари миқдорида жаримага тортилиши мумкин.
Бу чоралар 1996 йилда қабул қилинган қонунга таянади. Трамп ўзининг олдинги президентлик даврида ушбу қонунни 2018 йилда черковларда бошпана излаган тўққиз муҳожирга нисбатан қўллаб, уларга юз минглаб доллар миқдорида жарима солган эди.
Юқори мартабали расмийларнинг маълум қилишича, Трамп ушбу чораларни беш йил орқага қараб қўллаш имкониятини ҳам кўриб чиқмоқда, бу эса айрим муҳожирлар учун жарима миқдорини 1 миллион доллардан ошириб юбориши мумкин.
Трамп маъмуриятининг бу ёндашуви кўпроқ муҳожирларни қўрқитиш ва жамоатчилик устидан назоратни кучайтириш мақсадида амалга оширилаётгани айтилмоқда. Эслатиб ўтамиз, президент Жо Байден лавозимга келгач, бу жарималарни бекор қилган эди.
