Twitter’дан кўк белги олиб ташланади
Илон Маскнинг фикрича, бу маъносиз белгидир.
Twitter’нинг янги эгаси Илон Маск бир неча ой ичида ижтимоий тармоқнинг барча профилларида эскирган кўк белгиларни йўқотишга қарор қилди.
“Бир неча ой ичида биз барча эскирган кўк белгиларни олиб ташлаймиз. Уларнинг чиқарилиш усули бузуқ ва маъносиз эди”, — деб ёзди у.
Бундан ташқари, тадбиркор қўшимча функциялар пулли обуналарда очилишини маълум қилган. Шунингдек, пулли хизматлар тўлови оширилган. Масалан, iPhone иловаси орқали тўлов амалга оширилганда Twitter Blue одатдагидек 7,99 доллар эмас, 11 доллар.
“Биз қайтдик! Twitter Blue энди интернетда ойига 8 доллар эвазига ёки iOS’да 11 доллар эвазига мавжуд. Биз баъзи янгиланишлар ва яхшиланишларни амалга оширдик”, — дейилади постда.
Аввалроқ 1,5 миллиардга яқин фойдаланилмаётган Twitter аккаунтлари ўчириб ташланиши маълум қилинганди. Глобал брендлар Маск туфайли тармоқда реклама беришдан бош тортмоқда.
