"Украина билан музокаралар боши берк кўчага кирган" — Путин
Россия етакчиси Украинада содир бўлаётган воқеалар фожиа, лекин Россияда бошқа танлов йўқлигини айтди.
"Россия ва Украина ўртасидаги урушни тугатиш бўйича музокаралар тўхтаб қолди. Киев томонлар ўртасида Истанбулдаги музокараларда эришилган келишувлардан узоқлашди ва боши берк кўчага кирди", — деди Путин.
Кремл раҳбарининг қўшимча қилишича, кеча унга Киевнинг музокаралардаги позицияларида янги ўзгаришлар бўлгани ҳақида хабар берилган. Шунингдек, Путиннинг айтишича, Беларус музокаралар учун жуда мос.
"Фурсатдан фойдаланиб, беларуслик ҳамкасбларга ўз ҳудудида бир неча музокаралар раундларини яхши ташкил этгани учун ўз миннатдорчилигимни билдирмоқчиман”, — деди у Беларус раҳбари Александр Лукашенко билан музокаралар якунида.
Унинг сўзларига кўра, Украина томони билан тўғридан-тўғри мулоқотни бошлаш кўп жиҳатдан Беларус президентининг шахсий саъй-ҳаракатлари туфайли бўлди.
