«Янги Ўзбекистон» мажмуаси ва Мустақиллик монументининг очилиш маросими бўлиб ўтмоқда

 

 

Таъкидланишича, Мустақилликнинг 30 йиллигига бағишланган «Янги Ўзбекистон» мажмуаси ва Мустақиллик монументининг очилиш маросимида Ўзбекистон президенти Шавкат Мирзиёев иштирок этмоқда.

 

- Агар юқоридан назар ташласангиз, боғнинг шакли улкан дарахтнинг бешта шохига ўхшайди. Бу Ҳаракатлар стратегиясининг бешта устувор йўналишини ифода этади. 

 

Бу гўзал боғда пойтахтимиз аҳолиси, Тошкент вилояти ва барча ҳудудларимиздан, хориждан келадиган меҳмонлар яйраб дам олиши, оиласи, фарзандлари билан бирга мазмунли ҳордиқ чиқариши учун барча замонавий шароитлар яратилмоқда.  

 

Бу ерда сунъий кўл, спорт майдончалари, болалар ўйингоҳлари, амфитеатр, фавворалар, савдо ва хизмат кўрсатиш объектлари, ҳунармандчилик дўконлари барпо этилди ва этилмоқда, деди президент.

 

Давлат раҳбари мажмуа ёнида Олимпия шаҳарчаси бунёд этилиши, унда 2025 йили Ёшлар ўртасидаги Осиё ўйинларининг асосий мусобақалари ўтказилишини маълум қилди. 

 

Мажмуа ҳудудида замонавий олий таълим даргоҳи, тиббиёт клиникалари, халқаро кўргазма марказлари ва бошқа объектлардан иборат шаҳарча қурилмоқда.

 

Боғ мазмуни миллий давлатчилик тарихи, халқнинг бугунги интилишлари ва Учинчи Ренессанс мақсадларини ўзида мужассам этган. 104 гектарлик боғнинг умумий кўриниши Ҳаракатлар стратегияси йўналишларига монанд дарахтнинг бешта шохи шаклидадир. Бу ерда одамлар табиат қўйнида дам оладиган сўлим ҳудудлар барпо этилган.

 

 

Боғ ҳудудида «Истиқлол» мажмуаси қурилган. Унда Ўзбекистоннинг 3 минг йиллик тарихи, аждодларнинг буюк ишлари, Ўзбекистоннинг янги қиёфаси намоён этилган.

 

 

Бир гектардан зиёд майдонда 5 минг ўринли очиқ амфитеатр барпо этилди. Бу ерда умумхалқ байрамлари, маданий-маърифий тадбирлар ўтказилади. Мажмуа замонавий ёритиш ва акустика тизимлари билан жиҳозланган.