Японида 108 ёшли аёл Гиннес рекордлар китобига кирди
У дунёдаги энг кекса сартарош сифатида танилган.
Япониянинг Точиги префектурасида яшовчи Шитсуи Хакоиши расмий равишда дунёдаги энг кекса сартарош деб тан олинди. У 1916 йил 10 ноябрда туғилган бўлиб, 18 ёшидан бери сартарошлик билан шуғулланади.
Хакоишининг сартарошхонаси Токиодан уч соатлик масофада жойлашган бўлиб, у ҳали ҳам мижозлар илтимосига биноан ишлашда давом этмоқда. Рекордчи стилист урушдан олдинги даврлардан бери қўллаб келаётган қайчиларидан ҳозир ҳам фойдаланади.
Шитсуи Хакоиши 24 ёшида турмушга чиққан, бироқ турмуш ўртоғи Хитой-Япония урушида ҳалок бўлган. 1945 йилда Токио бомбардимон қилинганида, унинг сартарошхонаси бутунлай вайрон бўлган. У фарзандлари билан Точигига кўчиб ўтиб, 1953 йилда у ерда янги салон очган ва шу кунгача ўз ишини давом эттириб келмоқда.
Хакоиши узоқ умрнинг сири учта қоидага асосланишини айтади:
- Кин тутмаслик
- Ҳасад қилмаслик
- Ҳеч ким билан жанжаллашмаслик
Ҳозирда у кўп вақтини қариялар уйида ўтказади, бироқ садоқатли мижозлари мурожаат қилса, ҳали ҳам ишга қайтишдан мамнун.
