Зеленский ва Трамп можароси уюштирилганмиди?
Германиянинг бўлажак канцлери бунга муносабат билдирди.
Германия Христиан-демократик иттифоқи (ХДҲ) раҳбари ва бўлажак канцлер Фридрих Мерз АҚШда Владимир Зеленский ва Доналд Трамп ўртасида юзага келган кескинлик ҳақида ўз фикрини билдирди. Унинг сўзларига кўра, Оқ уйда бўлиб ўтган учрашувда юзага келган можаро АҚШ томонидан атайлаб қўзғатилган бўлиши мумкин.
Унинг фикрича, бу ҳолат АҚШ маъмуриятининг сўнгги ойлардаги умумий сиёсатига мос келади.
“Биз Вашингтонда кузатаётган воқеалар сўнгги ҳафталардаги воқеалар занжирига тўғри келади, жумладан, Америка делегациясининг Мюнхендаги хавфсизлик конференциясида қатнашиши ҳам шулар жумласидандир” – дея қўшимча қилди у.
Доналд Трампни нафақат Мерз, балки Полшанинг собиқ президенти ва «Бирдамлик» касаба уюшмаси етакчиси Лех Валеса ҳам танқид қилди. У АҚШ собиқ президентига мактуб йўллаб, Украина бўйича тутган позициясини қоралади.
“Биз сизнинг Украина президенти Владимир Зеленский билан суҳбатингизни даҳшат ва нафрат билан кузатдик. Украина АҚШ томонидан Россияга қарши курашда кўрсатилаётган моддий ёрдам учун миннатдор бўлиши керак деган фикрингизни ҳақоратли деб биламиз. Эркин дунё қадриятларини ҳимоя қилиш учун қон тўкаётган қаҳрамон украиналик аскарларга биз миннатдорчилик билдирамиз”, – деб ёзди Валеса.
Полшанинг собиқ президенти ва Тинчлик бўйича Нобел мукофоти совриндорининг мактуби Трампнинг Киевга нисбатан сиёсатини қоралаган энг кескин баёнотлардан бири сифатида эътироф этилмоқда.
