Қайси қонун сенаторлар томонидан рад этилди?

Сенатнинг ўн олтинчи ялпи мажлисида “Жиноий фаолиятдан олинган даромадларни легаллаштиришга қарши курашиш тартиби янада такомиллаштирилиши муносабати билан Ўзбекистон Республикасининг айрим қонун ҳужжатларига ўзгартиш ва қўшимчалар киритиш тўғрисида”ги Ўзбекистон Республикаси Қонуни муҳокама қилинди.

Мазкур Қонун билан 3 та Кодекс ва 8 та қонунларга ўзгартириш ва қўшимчалар киритилмоқда. Жумладан, “Жиноят ва Жиноят-процессуал” ҳамда “Маъмурий жавобгарлик тўғрисида”ги кодексларга, “Суд ҳужжатлари ва бошқа органлар  ҳужжатларини ижро этиш тўғрисида”ги, “Давлат божхона хизмати  тўғрисида”ги, “Давлат солиқ хизмати тўғрисида”ги ва “Қимматли қоғозлар  бозори тўғрисида”ги, шунингдек, “Прокуратура тўғрисида”ги қонунларга ўзгартириш киритилмоқда.

Муҳокама давомида сенаторлар томонидан Қонунни ишлаб чиқишда миллий қонун ҳужжатлари, хорижий мамлакатлар тажрибаси ва юрист-олимлар фикрлари ўрганилмаган ва таҳлил қилинмаганлиги қайд этилди.

Шунингдек, ушбу ҳолатлар, ўз навбатида, турли салбий оқибатларга олиб келиши мумкинлиги таъкидланди.

Шу боис Қонун сенаторлар томонидан рад этилди.