Кипрда кучли ўрмон ёнғинлари авж олмоқда
Мамлакат расмийлари буни тарихдаги энг йирик ёнғин деб атаб, халқаро ҳамжамиятдан ёрдам сўраб мурожаат қилишди.
Кипр Президенти Никос Анастасиадес Италия, Греция ва Исроилга ўт ўчириш самолётларини юбориш ваъдаси учун миннатдорчилик билдирди.
Европа комиссияси Кипрга ёрдам режасини, шу жумладан ўт ўчирувчи самолётларни юбориш имкониятини ишлаб чиқаётганини айтмоқда.
Кучли шамоллар фонида ёнғин айниқса Кипрнинг жанубида Лимассол минтақасида кенг тарқалмоқда. Бир нечта қишлоқлар аҳолиси эвакуация қилинган. Ўнлаб уйларга зарар етган, қурбонлар ҳақида маълумот берилмаган.
Бир ҳафтадан бери Кипрда 40 даража иссиқлик тўлқинлари кузатилмоқда. Мутахассислар ҳаддан ташқари юқори ҳарорат иқлим ўзгариши билан боғлиқ эканини таъкидлашмоқда.
