Жо Байден Гаитидаги вазиятдан хавотирда эканини айтди
Гаити бош вазири вазифасини бажарувчи Клод Жозеф АҚШ давлат котиби Энтони Блинкен билан музокара чоғида мамлакатда 26 сентябрга режалаштирилган сайлов муддати ўзгармаслигини билдирди.
Бу ҳақда Жозеф девонхонасининг Twitter´даги расмий саҳифасида хабар қилинмоқда.
"Ҳукумат раҳбари мухолифат етакчилари ва бошқа сиёсий иштирокчилар билан мулоқотга қиришиб, сиёсий-ижтимоий вазиятни тинчлантириш ва ишончли сайлов кенгашининг тасдиқланган режаси бўйича сайлов ўтказишга ваъда берди", - дейилади хабарда.
7 июль, чоршанбага ўтар кечаси Гаити президенти Жовенель Моиз номаълум шахслар томонидан ўз қароргоҳида отиб ўлдирилди. Мамлакатнинг биринчи хоними эса оғир жароҳатланиб, касалхонага ётқизилди.
Мамлакатда юзага келган вазият туфайли 15 кунлик мотам эълон қилинди.
Расмийларнинг хабар беришича, босқин олдиндан пухта режалаштирилган ва чет эллик ёлланма қотиллар томонидан амалга оширилган. Шу пайтгача ҳужумга алоқадор деб топилган 4 киши йўқ қилинди.
Ҳукумат жиноятчиларни қўлга олишда АҚШдан ёрдам сўраган. Америка президенти Джо Байден Гаитидаги вазиятдан хавотирда эканини билдирди. ЕИ дипломатияси раҳбари Жозеп Боррель ўзинигг Twitter´даги саҳифасида "бу жиноят мувозанатсизлик ва зўравонлик кучайишига олиб келади" деб ёзди. Бугун БМТ хавфсизлик кенгаши Гаитидаги вазият бўйича тезкор йиғилиш ўтказиши кутилмоқда.
Шарофат Маҳмудова
