Литва Белорусни юзлаб мигрантларни мамлакат ҳудудига юборишда айбламоқда
Литвалик мансабдорларнинг айтишича, қочоқлар аввал Бағдод ва Туркия шаҳарларидан Минскка етиб олади, сўнгги кунларда улар Белорус-Литва чегарасидан ўтишган. Литва бош вазири мамлакат чегарада тўсиқ ўрнатиши ва у ерга ҳарбийларни жойлаштиришини эълон қилди.
Чоршанба куни Литва ТИВ Белорус элчисини чақириб, Минскдан ноқонуний мигрантлар оқимини тўхтатишни талаб қилган. Чегара хизмати маълумотига кўра, июль ойининг дастлабки 7кунида чегарадан 799 нафар ноқонуний мигрант ўтган. 2021 йилнинг дастлабки 6 ойида уларнинг сони 636 тани ташкил этарди.
26 май куни Белоруссия президенти Александр Лукашенко энди унинг давлати Европа Иттифоқининг ғарбий чегараларини кесиб ўтмоқчи бўлган мигрантларга тўсқинлик қилмаслигини эълон қилган. Бу Ryanair самолетининг Минскда мажбуран қўндирилгани туфайли ғарб эълон қилган санкцияларга Белоруснинг жавоби бўлди.
Маълумот учун, 23 май куни Афинадан Вильнюсга учаётган Ryanair самолети Минскда мажбуран қўндирилган эди. Авиакомпания самолёт Минскда қўнишига сабаб Белорус диспечерлари лайнер бортида потенциал хавф борлиги ҳақида огоҳлантиргани эканини эълон қилди. Кейинчалик самолётда бомба борлиги ҳақидаги маълумот тасдиқланмади.
Шу рейс билан учаётган NEXTA ахборот портали асосчиси Роман Протасевич ва унинг дугонаси, Россия фуқароси Софья Сапега самолет қўниши билан қўлга олинган.
