Москвада Қурбон ҳайити намози масжидларда ўқилмайди
Москвада ҳайит намози фақат Жоме масжидида имомлар, муаззинлар ва муфтий ўринбосарлари иштирокида адо этилади.
Пандемия сабабли Москвада Қурбон ҳайити намози онлайн ўқилади, шаҳар масжидлари намозхонлар учун ёпиқ бўлади. Бу ҳақда Россия мусулмонлари диний бошқармаси уламолар кенгаши хабар бермоқда.
«Москвада ҳайит намози фақат Жоме масжидида имомлар, муаззинлар ва муфтий ўринбосарлари иштирокида адо этилади. Бошқа масжидларда, шунингдек, мусулмонларнинг маҳаллий диний ташкилотларида ҳайит намози ўқиш тавсия қилинмайди. Барча мусулмонларга байрамни ўз уйларида, оила даврасида ўтказиш тавсия қилинади», — дейилади муфтият сайтида.
Қайд этилишича, ҳайит намози ўқилиши жараёни «Россия 1» телеканали орқали трансляция қилинади.
Хабарда айтилишича, мусулмонлар диний бошқармаси таркибига кирувчи мусулмонларнинг ҳудудий диний идоралари ҳайит намозини ўқиш тартибини жойларда эпидемиологик вазиятни ҳисобга олган ҳолда ўзлари ҳал қиладилар.
2021 йилда Қурбон ҳайити 20 июлда нишонланиши белгиланган.
