Мавлуд Човушўғли Фарғонага келди
Бугун, 14 июль куни Туркия Республикаси ташқи ишлар вазири Мавлуд Човушўғли Ўзбекистонга ташриф буюрди. Меҳмоннинг самолёти Фарғона халқаро аэропортига қўнган.
Аввал хабар берганимиздек, 15-16 июль кунлари Тошкентда бўлиб ўтадиган «Марказий ва Жанубий Осиё: минтақавий ўзаро боғлиқлик. Таҳдид ва имкониятлар» мавзусидаги халқаро конференцияда иштирок этиш учун мамлакатимизга келган Туркия ташқи ишлар вазири Мевлют Чавушоғлу ўз сафарини Фарғонадан бошлади.
Юқори мартабали меҳмонни аэропортда Маданият вазири Озодбек Назарбеков ҳамда Туризм ва спорт вазирининг биринчи ўринбосари Улуғбек Аъзамов кутиб олди. Ташриф давомида уларга шунингдек икки томоннинг фавқулодда ва мухтор элчилари ҳамроҳлик қилмоқда.
Кутиб олиш маросимидан сўнг Мавлуд Човушўғли Марғилондаги ҳунармандчилик маркази томон йўл олди.
Бу Мавлуд Човушўғлининг Ўзбекистонга иккинчи ташрифи бўлиб, бундан олдин у 2021 йилнинг 6-9 март кунларида Хива, Самарқанд, Бухоро ва Тошкент шаҳарларида бўлган.
Ташриф режасига кўра, кун давомида Туркия ташқи ишлар вазири Марғилондаги Ҳунармандлар марказини ҳама Олтиариқ туманидаги узумчилик боғларини бориб кўради, Қўқондаги Худоёрхон саройи ҳамда Жоме мажмуаси билан танишади.
Мевлют Чавушоғлу бугун кеч соатларда Фарғонага ташрифини якунлаб, эртага бошланадиган халқаро конференцияда иштирок этиш учун Тошкентга учиб кетади.
