Россияда Бухородан помидор ва қалампир импорт қилишга чеклов қўйилди
Россиянинг Ветеринария ва фитосанитария бўйича федерал хизмати («Росселхознадзор») 15 июлдан бошлаб Ўзбекистоннинг Бухоро вилоятидан Россияга помидор ва қалампир импорт қилишга вақтинчалик чеклов ўрнатди. Бу ҳақда «Росселхознадзор» маълум қилди.
Чекловга сабаб қилиб, Бухородан етказиб берилаётган помидорларда «помидор жигарранг бужмайиш вируси» (tomato brown rugouse fruit virus — ToBRFV) аниқлангани кўрсатилган.
15 июлгача бўлган вақтда жўнатилган партияларга фақатгина фитосанитария текширувидан ўтгандан сўнг Россия ҳудудига олиб киришга рухсат берилади.
Эслатиб ўтамиз, жигарранг бужмайиш вируси аниқлангани сабабли «Росселхознадзор» 2020 йил 26 ноябрдан бошлаб Фарғона вилоятидан Россияга помидор ва қалампир олиб киришни тақиқлаган эди. Кейинроқ қуритилган ўрик партиясида ҳам хавфли зараркунанда (капр қўнғизи) аниқлангач, «Росселхознадзор» Фарғонадан барча турдаги ўсимлик маҳсулотлари импортини тақиқлади. Россия томони шу каби тақиқларни Навоий ва Қашқадарё вилоятида етиштирилган маҳсулотларга ҳам жорий этган.
