Шаҳзода Жоржнинг «Евро-2020» финалидаги реакцияси мемга айланди
Кембриж герцогларининг етти ёшли ўғли шаҳзода Жорж «Евро-2020» финалидаги Англия ва Италия ўйинини ота-онаси билан стадионда томоша қилди. Қироллик оиласининг Лондондаги Уэмли стадионида тушган фото ва видеолари ижтимоий тармоқларда кенг муҳокамаларга сабаб бўлмоқда, деб хабар беради «Korrespondent.net».
Фойдаланувчилар кичкина шаҳзоданинг ўйин давомидаги ҳиссиётли ҳаракатларига эътибор қаратган.
Ўйиннинг иккинчи дақиқасида британиялик футболчи Люк Шоу италияликлар дарвозасига гол урганида Жорж ўзининг ҳайратини яшира олмай, чин дилдан кулган ва онаси Кейт Миддлтонни қаттиқ қучоқлаб олган.
Унинг бу каби ҳаракати интернетда мемга айланиб, Twitter’даги футбол ишқибозлари томонидан кенг муҳокама қилинмоқда. Айримлар ушбу роликни бутун умр қайта кўришга тайёрлигини ёзяпти.
Шаҳзоданинг бундай ҳиссиётли қўллаб-қувватлови ўйин жараёнини ўзгартириб юбормаган: пенальтилар сериясидан сўнг, Европа чемпионатидаги ғалаба Италия футболчиларига насиб этди.
Жорж бундан жуда қаттиқ хафа бўлган ва унинг ғамгин суратлари фолловерларнинг кўнглини бузиб юборган.
«Айни вақтда бутун Англия — бу Жорж», — деб ёзади фойдаланувчиалрдан бири.
