Техасдаги отишмада бир нафар полициячи ҳалок бўлди, тўрт киши жароҳатланди
Техас штатининг Левелленд шаҳрида юзага келган отишма натижасида бир полициячи ҳалок бўлди, яна тўрт нафари жароҳатланди.
Бу ҳақда KWTX телеканали хабар бермоқда.
"Жиноятчи билан отишмада махсус хизмат отряди раҳбари олган жароҳатлари туфайли ҳалок бўлди", - дейилади телеканал хабарида.
Полициянинг қолган ходимлари шифохонага ётқизилди, ҳозирда уларнинг аҳволи яхшилангани айтилмоқда.
Бир кун олдин Техас йўл патрули ҳайдовчининг тажовузкор ва эҳтиётсиз машина бошқараётгани ҳақида хабар берган. Кейинроқ полицияга маҳаллий аҳоли вакилларидан бири қўнғироқ қилиб, қўшниси ўзини ғалати тутаётгани ва катта тўппонча кўтариб юрганини хабар қилган.
Воқеа жойига етиб келган полиция ходимлари ва жиноятчи ўртасида отишма келиб чиққан.
