Макрон телефонини ўзгартирди
Франция президенти Эммануэль Макрон Исроилнинг Pegasus шпион дастурининг қурбони бўлганлиги ҳақидаги хабарлардан сўнг телефони ва рақамини ўзгартирди.
Президент девонининг таъкидлашича, Макрон хавфсизлик протоколларини кўриб чиқишни ҳам буюрган.
Шу ҳафта бошида ОАВ Макрон ва бир қатор Франция вазирларининг смартфонлари Pegasus дастури орқали тингланаётгани мумкинлиги ҳақида хабар тарқатди. Ушбу дастурдан Марокаш махсус хизматлари фойдаланганлиги тахмин қилинмоқда. Марокаш расмийлари бу айбловларни рад этишди ва буни "асоссиз ва нотўғри" эканлигини таъкидлашган.
Исроилнинг NSO Group компаниясининг Pegasus дастури смартфонлар учун энг яхши шпион дастурларидан бири ҳисобланади. Кузатув реал вақт режимида амалга оширилиши ва мессенжерларнинг шифрланишини четлаб ўтиши мумкин. Дастур телефонга юборилган ва қабул қилинган хабарларни кўчиради, фотосуратларни тўплайди ва қўнғироқларни ёзиб олади.
Бундан ташқари, Pegasus микрофон ва видеокамерадан фойдаланиш ҳуқуқига эга. Дастур ёрдамида телефоннинг жойлашишини кузатиш мумкин.
NSO Group дастурий таъминотни фақат давлат идораларига ва терроризм ва жиноятчиликка қарши кураш учун сотишини айтмоқда.
Дастур Франция раҳбарининг телефонига ўрнатилганми ёки йўқми номаълум. Аммо унинг рақами 2016 йилдан бери Pegasus яратувчиси NSO Group мижозлари томонидан нишонга олинган деб ҳисобланган 50 000 та контактлар рўйхатида эди. Ушбу рўйхатга сиёсатчилар ва давлат раҳбарлари, корхона раҳбарлари ва фаоллар киритилган.
Венгрия, Исроил ва Жазоир ҳукуматлари ундан фойдаланиш бўйича текширув бошладилар.
Аввалроқ Германия канцлери Ангела Меркель ва бошқа немис сиёсатчиларининг телефонларини тинглаш билан боғлиқ можаро юз берган эди. ОАВ Дания махсус хизматларининг алоқаси борлигини эълон қилди.
Шунингдек, Сербия президенти Александар Вучич ва унинг оила аъзолари тинглангани маълум бўлди.
Насиба Тўхтаева
