Ўзбекистонга 1,2 млн доза Pfizer вакцинаси олиб келинади
Президент Шавкат Мирзиёев 29 июль куни Олмалиқ шаҳрига ташрифи чоғида Jurabek Laboratories МЧЖ қўшма корхонасида COVID-19’га қарши вакцина ишлаб чиқариш жараёнлари билан танишди.
Учрашувда маълум қилинишича, Ўзбекистонга яна 17,9 миллион доза вакцина етиб келиши кутилмоқда:
- Moderna — 3 миллион доза;
- Pfizer/BioNTech — 1,2 миллион доза;
- ZF-UZ-VAC2001 — 12 миллион доза;
- «Спутник V» — 1,7 миллион доза.
Маълумотга кўра, 2021 йилда харид қилинган барча вакциналарга 44 миллион 761,5 минг доллар сарфланган. Улардан ўзбек-хитой вакцинасига 39 миллион 100 минг доллар, «Спутник V» вакцинасига 3 миллион 681,5 минг доллар ва AstraZeneca вакцинасига 1 миллион 980 минг доллар сарфланган.
Соғлиқни сақлаш вазирлиги маълумотларига кўра, 2021 йил 21 июлга келиб Ўзбекистонга 8,5 миллион доза ZF-UZ-VAC2001 вакцинаси келтирилган. Ўзбек-хитой вакцинасига 39 миллион 100 минг доллар сарфланганидан келиб чиқса, ушбу вакцина ўзбекистонликларга 4,6 доллардан тушмоқда.
