Макрон ўзининг Гитлерга ўхшатилишига чидай олмади
Франция президенти Эммануэл Макрон ўзининг Адольф Гитлерга ўхшатиб қилинган коллажи учун Мишел-Анге Флори исмли фуқарони судга берди.
Коллаж Франциянинг жанубидаги Тулон ва Ла-Сен-сюр-Мер шаҳарлари ўртасида осилган бўлиб, унда президент Макрон фашистлар етакчиси Гитлерга ўхшатилган ва ёнига «Итоат қил, эмлан!» деб ёзилган. Макроннинг истагига кўра, Париждаги адвокатлик фирмаларидан бири ушбу коллажни тайёрлаган Флорининг устидан судга шикоят қилди. Флори “жамоат жойида президентни ҳақорат қилиш” бўйича айбланяпти.
Франция президенти баъзи касб эгаларининг коронавирусга қарши мажбурий эмланиши ҳақидаги қонун туфайли танқидга учраяпти. 26 июль куни парламентда қабул қилинган қонунда касалхоналар ва қариялар уйлари ходимлари, ўт ўчирувчилар сингари муайян касб эгаларининг мажбуран эмланиши белгилаб қўйилган. Оммавий норозилик намойишлари ҳам ушбу қонуннинг қабул қилинишини тўхтатиб қололмади.
