Афғонистон мудофаа вазири хонадони ўққа тутилди
Афғонистон мудофаа вазири генерал Бисмилла Хон Муҳаммадийнинг Қобулдаги уйига уюштирилган ҳужум натижасида 4 киши ҳалок бўлди ва яна 20 киши яраланди. Бу ҳақда France Press агентлиги хабар қилмоқда.
Жангарилар вазирнинг уйи олдида автомобилни портлатиб, бир неча марта ўқ узишган.
Ҳужум уюштирган 4 киши воқеа жойида ўлдирилди. АҚШ давлат департаменти маълумотига кўра, ҳужумчилар “Толибон” ҳаракати аъзолари бўлган.
Вазирнинг оиласи вақтида эвакуация қилинди. Воқеадан бироз ўтгач, Бисмилла Хон Муҳаммадийнинг ўзи оиласининг аҳволи яхшилигини эълон қилди.
Бироз аввал, ўтган йили Афғонистон ҳукумати АҚШ босими остида озодликка чиқарган 5 минг “Толибон” жангарилари айни дамда мамлакатдаги курашда асосий куч вазифасини ўтаётгани ҳақида хабар қилган эдик.
Эслатиб ўтамиз, АҚШ президенти Жо Байден 11 сентябрга қадар Афғонистондан қўшма штатлар ҳарбийлари чиқарилиши ҳақида эълон қилганидан сўнг вазият янада кескинлашди. Айни дамда “Толибон” мамлакатнинг каттагина қисмини қўлга олган. Покистон билан чегарадор ҳудудда ўз байроғини ҳам ўрнатган.
Шарофат Маҳмудова
