Босқинчига психиатрик экспертиза тайинланди
Бугун Украина Вазирлар Маҳкамаси биносига кириб, бинодаги одамларни портлатиш билан таҳдид қилган эркак киши ҳақида хабар берган эдик.
Эркакнинг таниши у билан музокара олиб бораётган вақтда полициячилар уни хавфсизлантиришди ва бинодан олиб чиқишди.
Аниқланишича, унинг исми Владимир Прохнич бўлиб, у айни пайтда Киевнинг Ирпень шаҳрида тадбиркорлик билан шуғулланади.
Прохнични 2015 йилда Петр Порошенко 3 даражали "Мардлик" ордени билан тақдирлаган.
Маълумотларга кўра, Владимир Прохнич 1978 йилда туғилган. У Луганск вилоятининг Счастье шаҳрида хизмат қилган. ИИВ манбасининг айтишича, у "Айдар" батальонида сапёр бўлган ва урушда бош миясидан жароҳат олган.
Прохнич ўзининг Facebook саҳифасида Ирпенга қўшни бўлган Буча шаҳрида фуқаролик фаолияти билан шуғулланишини билдирган. Унинг саҳифасида "Бучанская варта" ташкилотининг сурати ҳам бор.
Ташкилот етакчиларидан бири - Василий Олесюк бугун у билан музокара олиб бориб, таслим бўлишга кўндирди.
Украина прокуратураси Владимир Прохничнинг ҳаракатлари сабаби ҳақида қисқа маълумот берди: унда айтилишича, Прохнич ҳукумат иши ва собиқ ҳарбийларнинг молиявий аҳволидан норози бўлган.
ИИВ раҳбари Денис Монастырскийнинг сўзларига кўра, террорчига психиатрик экспертиза тайинланди.
Агар экспертиза уни айбсиз деб топса, собиқ ҳарбий қамоқ жазосидан қутулиб қолиши мумкин.
Шарофат Маҳмудова
