Mattel компанияси дунёга машҳур аёлларнинг Барби қўғирчоғи қиёфасини яратишга киришди
Mattel компанияси AstraZeneca вакцинаси устида ишлаган профессор-вакцинолог Сара Гилбертнинг Барби қўғирчоғи қиёфасини яратди.
Профессорнинг айтишича, компания таклифи унга дастлаб ғалати туюлган, аммо кейинчалик у бундай “барби”ларнинг илм-фан, технология, муҳандислик ва математика соҳаларида (STEM , Science, Technology, Engineering and Mathematics) карьера қилишга илҳомлантиришига умид қилган.
“Менинг қиёфамдаги “қўғирчоғим” болаларга улар олдин билмаган касблар, жумладан, вакцинология ҳақида маълумот бериши ва шу соҳага қизиқишини истардим”, - деган олима The Guardian нашрига берган интервьюсида.
Mattel илм-фан ва технология соҳасида (STEM) катта ютуқларга эришган яна 5 нафар аёлга бағишланган Барби ишлаб чиққан. Улар орасида кўпмарталик ҳимоя костюмини яратган австралиялик олим Кибри Уайт ва бразилиялик Жаклин Гоэс де Жезус ҳам бор.
Шарофат Маҳмудова
