Тожикистон президентининг ҳам коронавирусга қарши эмлангани маълум қилинди
Аммо қачон ва қандай вакцина олгани ҳақида аниқ маълумот берилмаган.
Мамлакат Соғлиқни сақлаш вазирлигига кўра, айни вақтда мамлакатда 3 турдаги вакцина амалда қўлланиб келинмоқда. Булар Британия ишлаб чиқарувчиларининг АстраЗенеса, Хитойнинг СоронаВас ҳамда АҚШнинг Модерна вакциналаридир. Бундан ташқари айрим манбалар Тожикистонга Россиянинг Спутник В вакцинасидан 3 минг доза вакцинаси келтирилишини айтмоқда.
Ўз вақтида Имомали Раҳмон барчани коронавирусга қарши эмланишга, ўз соғлиқлари учун қайғуришга ва коронавируснинг янги штаммларидан ҳимояланишга чақирган.
“Шахсан мен, коронавирусга қарши эмландим. Сизларга ҳам вакцина олишни маслаҳат бераман”, деган президент.
Эслатиб ўтамиз, аввалроқ Ўзбекистон Президенти ҳам коронавирусга қарши эмлангани эълон қилинган эди. Аммо президентнинг айнан қайси вакцина билан эмлангани ҳақидаги маълумот очиқланмаган.
Қирғизистон президенти Садир Жапаров эса жорий йилнинг 23 июль санасида омма олдида Хитойнинг Синопҳарм компанияси коронавирусга қарши ишлаб чиқарган вакцинани қабул қилган эди.
Қозоғистон президенти Қосим-Жомарт Токаев эса Россиянинг Спутник-В вакцинаси билан эмлангани маълум қилинган эди.
Россия президенти Владимир Путин 23 март куни Спутник В нинг биринчи, 14 апрелда эса иккинчи дозасини қабул қилгани айтилган эди.
