Вакцина олганлар COVID-19ни бошқаларга қараганда 3 баробар кам юқтириши аниқланди
Лондон Империал коллежи ва Ipsos MORI маркетинг тадқиқотлари мутахассисларининг фикрига кўра, COVID-19 вакцинасининг икки компонентини олган одамларда касаллик юқтириш хавфи кам.
Улар эмланмаган одамларга қараганда уч баробарга кам касаллик юқишини аниқладилар.
Англияда REACT-1 деб номланган коронавирусни назорат қилиш дастури тадқиқот натижалари 24 июндан 12 июлгача текширувда бўлган 98 233 кишидан олинган тест натижаларига асосланган.
«Бугунги натижалар COVID-19 га қарши эмлашнинг муҳимлигини яққол кўрсатмоқда, чунки эмланмаганларда касалланиш ҳолати вакцина олганларга нисбатан уч баробарга кўпроқ»,-деди Ipsos MORI жамоатчилик билан алоқалар бўйича бошқарувчи директори Келли Беавер.
Бундан ташқари, тадқиқотчилар тўлиқ эмланган одамлар эмланмаганларга қараганда вирусни бошқаларга юқтириш эҳтимоли камроқ, чунки улар вирусни камроқ ташувчи бўлиб хизмат қилади, деган хулосага келишган.
