Хитой карантинда тиббий ниқоблардан қанча даромад кўрди?
Хитой 2020 йилда тиббий ниқоблардан 90 миллиард долларга яқин даромад топгани айтилди.
Бу ҳақда Spot нашри хабар берди.
Келтирилишича, Хитой пандемия бошланганидан бери хорижий давлатларга тиббий ниқоб ва респираторларнинг экспортини деярли тўрт бараварга оширган. 2020 йил апрель ҳолатига битта ниқоб ёки респираторнинг экспорт нархи 2019 йил декабрига нисбатан 720,8 фоизга ортган.
Петерсон Жаҳон иқтисодиёти институти (PIIE) таҳлилчиларининг ҳисоботига кўра, Хитой шахсий ҳимоя воситаларининг (ШХВ) экспортини қарийб тўрт баравар оширишга муваффақ бўлди.
2019 йилда мамлакат 22,9 миллиард долларга, 2020 йилда 88,1 миллиарга тиббий шахсий ҳимоя воситаларини сотган. 2020 йилда тиббий ниқоб ва респираторлар экспорти 53,8 миллиардга баҳоланмоқда (2019 йилга нисбатан 48,8 долларга кўп), пластик ниқоблар — $16,8 миллиард (2019 йилда $3,5 млрд), ҳимоя кийимлари — $10,8 миллиард ($9,9 млрд), қўлқоплар — $3,9 миллиард ($2,9 млрд).
PIIE ҳисоб-китобларига кўра, 2020 йил апрель ҳолатига битта ниқоб ёки респираторнинг экспорт нархи 2019 йил декабрига нисбатан 720,8 фоизга ошди. Ҳимоя кийимлари тўпламининг нархи 536,2 фоизга ошган.
2020 йил апрель ойида шахсий ҳимоя воситалари экспорти пандемия бошланишидан аввалги даражага етди. Ўша йилнинг ёзида эса рекорд ўрнатишни бошлади. Хитой ҳукумати, шунингдек, қалбакилаштириш ҳоллари ортгани учун маҳсулот сифати устидан назоратни кучайтирди.
Европа Иттифоқига Хитой шахсий ҳимоя воситалари экспорти 2019 йилдаги 3,9 млрд доллардан 2020 йилда 23,4 млрд долларга ошди. АҚШга экспорт эса 7,1 млрд доллардан 24,6 млрд долларга ошган.
