Барак Обама юбилейида иштирок этганлар эълон қилган сурат ва тасвирларни ўчириб ташлашди. Нега?
АҚШнинг 44-президенти Барак Обаманинг 60 ёшлигини нишонлашга таклиф этилган меҳмонлар ижтимий тармоқдаги ўз саҳифаларида тадбир давомида ва ундан кейин жуда кўп фото ва видеотасвирларни эълон қилган эдилар. Аммо улар тасвирларни бир неча соатдан сўнг оммавий равишда ўчира бошлашди.
Обамани табриклаган рэпер Трэп Бэкхем Instagram'да маросимдаги дастурхон, шунингдек, ҳамманинг кўз олдида марихуна чекканини эълон қилди. Лекин орадан кўп ўтмай у ҳам суратларни ўчириб, буни тадбирнинг асосий шартларидан бири — тасвирга олиш тақиқлангани билан изоҳлади.
Исмини ошкор қилмаган бошқа меҳмонлар ҳам ижтимоий тармоқлардаги сурат ва видеоларни ўчиришни туғилган кун эгасининг ўзи сўраганини айтишган. Чунки меҳмонлар орасида ниқобсиз юрганлар кўп бўлган.
Fox News хабарига кўра, базм аъло даражада ўтган. Обама тинмай рақсга тушган. Бэкхем уни олдин ҳеч ким бундай ҳолатда кўрмаганини айтган. Журналистларнинг ҳисоб-китобига кўра, базм Обама оиласига 1 миллион долларга тушган.
Бундан аввал собиқ президент Барак Обама 60 ёшини Мартас-Виньярд оролида нишонлаши ҳақида хабар берган эдик.
Шарофат Маҳмудова
