Буюк Британия 2005 йилдаёқ коронавирусга қарши кураш режасига эга бўлган, аммо...
Британия ҳукумати пандемиянинг дастлабки босқичида 2005 йилда ишлаб чиқилган эҳтимолий коронавирус инфекцияси эпидемиясига қарши кураш режасидан фойдаланмади.
The Independence нашрининг маълум қилишича, 15 йил давомида ҳукумат 48 саҳифали ушбу ҳужжатнинг мавжуд эканлигини унутиб қўйди.
Қўлланмани ишлаб чиқишда қатнашганлардан бири, Британия ҳукуматининг собиқ бош илмий маслаҳатчиси Девид Кингнинг фикрича, бу режа ҳукумат эътиборидан четда қолган. “Минглаб инсонлар ҳаёти сақланиб қолиши мумкин эди. Фикримча, иқтисодиёт ҳам анча яхши аҳволда бўларди” , деган Кинг.
2020 йил бошида ҳукумат 2011 йилда ишлаб чиқилган янги грипп турлари пандемиясига қарши кураш режасини ”Covid-19 га” қарши кураш стратегиясининг асоси қилиб олди. The Independece нашри таҳлилчилари фикрига кўра, 2005йилда ишлаб чиқилган қўлланма янги шароитга кўпроқ мос тушарди — у 2002-2003-йилларда тарқалган атипик пневмония эпидемиясидан кейин тузилган эди.
Нашрнингфикрича, 2005 йилги режага қатъий амал қилинган тақдирда ҳукумат бир неча ҳафтагина чекловлар жорий этган бўларди, режа қуйидагиларни назарда тутган:
Биринчидан, касаллик тарқалган давлатлардан кириб келганлар учун ихтиёрий карантин жорий этиш;
Иккинчидан, оммавий тадбирларни бекор қилиш;
Учинчидан, шахсий ҳимоя воситалари захирасини яратиш.
Буюк Британияда шу кунга қадар “COVID19” оқибатида 150 мингдан зиёд киши вафот этди, қироллик 3 маротаба умуммиллий локдаун эълон қилди.
Жаҳонгир Қўзиев
