Ўзбекистонда тадбиркорларнинг радар ва камера ўрнатишига рухсат бериладиган ҳудудлар сони ортди
E-ijro auksion’да тадбиркорларнинг радар ўрнатишига рухсат бериладиган ҳудудлар сони ортди. Бу ҳақда онлайн-аукцион маълумотларига таяниб, Spot хабар берди.
Ҳозирда уларнинг сони 344 тани ташкил этмоқда, июнь охирида лотлар сони 72 та эди. Тошкентда тадбиркорларнинг радар ва камера ўрнатиши мумкин бўлган нуқталари сони 39 тага етган. Энг кўпи Бухоро вилоятида бўлса (62 та), энг ками — Хоразмда (12 та).
Барча лотлар ушбу ҳудуддаги автомобиллар оқими ва сўнгги икки йил давомидаги қоидабузарликлар тўғрисидаги маълумотлар билан келтирилган. Шу орқали қоидабузарликлар орқали қанча пул ишлаб топиш мумкинлигини прогноз қилиш мумкин.
Таъкидланишича, тадбиркорларни жалб этиш орқали 2021—2022 йилларда мамлакат бўйлаб 3356 та видеокамера ва 763 та радар ўрнатиш режалаштирилган.
Бу каби лотларга талаб юқори — савдолар давомида нархлар бир неча ўн баробарга ошмоқда. Масалан, июль ойида шу каби ҳудудлардан бири 40 миллион сўмга сотилган — бу бошланғич нархидан 27 баробарга кўп демак.
