Ўзбекистонда «Меҳр дафтари» шакллантирилади
Президент қарри асосида Ўзбекистонда «Меҳр дафтари»ни шакллантириш тартиби белгиланди. Бу ҳақда ЎзА хабар берди.
Маълум бўлишича, 1 ноябрдан бошлаб «Меҳр дафтари» тизими доирасида амалга ошириладиган чора-тадбирларни молиялаштириш учун етим болалар ва ота-она қарамоғидан маҳрум бўлган болаларни қўллаб-қувватлаш жамғармалари ташкил этилади. Шунингдек, молиялаштириш ишлари Қорақалпоғистон вазирлар кенгаши, вилоятлар ва Тошкент шаҳар ҳокимликлари томонидан бажарилиши айтилган.
Таъкидланишича, дафтарга киритилган етим болалар ва ота-она қарамоғидан маҳрум бўлган болаларни қўллаб-қувватлаш жамғармасининг маблағлари ҳомийлик маблағлари, алкоголь маҳсулотларининг (пиво ва табиий вино бундан мустасно) улгуржи савдоси билан шуғулланувчи корхоналар соф тушумининг уч фоизи миқдоридаги ажратмалардан олинади. Шунингдек, ушбу тартиб 1 январдан амал қилиши маълум бўлган.
Аввалроқ Ўзбекистонда «Аёллар дафтари»га киритилганларнинг фарзанди боғчага имтиёз асосида қабул қилиниши хабар қилинган. Шунингдек, Ўзбекистонда «Темир дафтар»га киритилган оилаларнинг фарзандлари контракти биринчи ўқув йилида тўлаб берилиши бўйича маълумот берилган.
