Қирғиз-тожик чегарасидаги вазият: Қирғизистонга ўқ отилган, Тожикистон ҳандақлар қазимоқда
Куни кеча Қирғизистоннинг Боткен вилоятига Тожикистон билан чегарасидан ўқ узилди. Бу ҳақда “Sputnik Кыргизистан” маълум қилди.
11-август куни Қирғизистоннинг Боткен вилоятига Тожикистон чегараси тарафдан ўқ узилган. Ўқ маҳаллий шифохона деразасига бориб теккан.Тожикисон тарафи чегарачилар қурол-яроғларини текширувдан ўтказгани, лекин қурол ишлатилмаганини маълум қилган.
Вазият кескинлашуви ортидан Тожикистон тарафида чегара яқинида ҳандақлар қазилётгани маълум бўлди. Қирғизистон Президентининг Боткен вилоятидаги вакили Абдикарим Алимбаевнинг сўзларига кўра, яқин кунларда Боткен ва Тожикистоннинг Сўғд вилоятлари раҳбарлари учрашуви ўтказилади. “Кескинлашувнинг олдини олишнинг ягона йўли — музокаралар”,- дея таъкидлаган Алимбаев.
Эслатиб ўтамиз, 2021 йил апрель ойида икки мамлакат чегараси ҳудудида низо юзага келган, натижада ҳар икки томондан қурбонлар бўлган эди.
Жаҳонгир Қўзиев
