Россияда ўзбекистонлик эркак маҳаллий фуқарога пичоқ билан таҳдид қилди
Россиянинг Владивосток шаҳрида маҳаллий фуқарога пичоқ билан таҳдид қилиб, россияликлардан нафратланишини айтган ўзбекистонлик эркак қўлга олинди.
Бу ҳақда «РИА Новости» хабар берди.
Маълумотларга кўра, воқеа Владивостокнинг Первореченск туманида содир бўлган, ўзбекистонлик эркак 33 ёшли маҳаллий фуқарога кечаси автотураргоҳ ёнида таҳдид қилган.
«33 ёшли маҳаллий фуқаро ёнига машиналар тўхташ жойида маст эркак келиб, ҳақорат қила бошлаган, шунингдек, Россия фуқароларидан нафратланишини ҳам айтган. Шу билан бирга, чет эл фуқароси унга пичоқ кўрсатиб, зўравонлик билан таҳдид қилган. Қўрқиб кетган жабрланувчи воқеа жойидан қочиб, полицияга мурожаат қилган», — дейилади хабарда.
Полициянинг билдиришича, жиноят содир этганликда гумон қилинаётган ўзбекистонлик 30 ёшли эркак кафелардан бирига ишга кирмоқчи бўлганида ушланган бўлиб, унга нисбатан «Зўравонлик таҳдиди билан, оммавий равишда содир этилган, нафрат ва адоватни қўзғатиш, шунингдек, ирқи, миллати бўйича инсон қадр-қимматини камситишга қаратилган ҳаракатлар» моддаси бўйича жиноят иши очилган.
Қайд этилишича, гумонланувчи 6 йилгача қамоқ жазосига ҳукм қилиниши мумкин.
