Ҳафта бошида салқин об-ҳаво сақланиб туради - «Ўзгидромет»
Ўтган дам олиш кунлари об-ҳаво Ўзбекистон аҳолисига иссиқдан дам олиш имконини берди. Ғарбий Қозоғистон ҳудудларидан салқин ҳавонинг кириб келиши ҳаво ҳароратини меъёрдан 3-5 даражага пасайтирди.
“Ўзгидромет” хабарига кўра, кечаси ва эрта тонгда ҳаво ҳарорати 13-16 даража илиққача пасайди, кундуз кунлари эса ҳарорат 29-32 даража иссиқдан юқорига кўтарилмади, фақат жанубий ҳудудларнинг энг чеккасида 32-35 даража иссиқ қийматларига етди.
Ҳафтанинг бошида салқин об-ҳаво сақланиб туради. Бугун кундуз куни ҳарорат 28-33 даража иссиқ, эртага 30-35 даража иссиқ атрофида бўлади.
Чоршанба кунидан эса салқин ҳаво массаси Ўзбекистон ҳудудидан чекина бошлайди ва унинг ўрнига Эрон ҳудудларидан нисбатан иссиқ об-ҳаво кириб келади.
Ҳаво ҳарорати аста-секин кўтарилади ва ҳафтанинг охирига келиб, кечалари 18-20 даража иссиққача, кундуз кунлари 36-38 даража иссиққача кўтарилади.
Маълум қилинишича, бундай ҳарорат август ойининг иккинчи ярми учун бўлган ўртача кўп йиллик қийматлардан 2-3 даражага юқори бўлади. Бироқ, ушбу даврда Ўзбекистон ҳудудида энг иссиқ йилларда ҳарорат 40-41 даража иссиққача, жанубда эса 42-44 даража иссиққача кўтарилган.
Республика бўйича ҳафта давомида ўртача бўлган шамоллар билан қуруқ ва асосан кам булутли об-ҳаво сақланиб туради.
Фарғона водийси вилоятларининг айрим тоғли ҳудудларида фақат бугун кечқурун момақалдироқ билан қисқа муддатли ёмғир ёғиши мумкин.
