Самарқандда фуқарони магистратурага киритиб қўйиш учун 17 минг доллар олган эркак ушланди

Бу ҳақда вилоят Ички ишлар бошқармаси ахборот хизмати хабар қилди.

Маълум бўлишича, Самарқанд вилояти Жомбой туманида яшовчи йигит ички ишлар ходимларига Қашқадарё вилояти Китоб туманида яшовчи фуқаро унга Давлат тест марказидаги танишлари орқали Самарқанд ветеринария медицинаси институти магистратурасига ўқишга киритиб қўйишини айтиб, хизмати эвазига 17 минг доллар талаб қилганини билдириб, қонуний чора кўришни сўраган.

Қайд этилишича, Давлат хавфсизлик хизмати ва Ички ишлар вазирлиги вилоят бошқармалари 9 август куни тезкор тадбир ўтказиб, Самарқанд шаҳар Ислом Каримов кўчасида фуқародан пул олаётган шахсни далилий ашёлар билан қўлга олган.

Таъкидланишича, ҳолат юзасидан унга нисбатан Жиноят кодексининг 168-моддаси (Фирибгарлик) 4-қисми ва 211-моддаси (Пора бериш) 3-қисми билан жиноят иши қўзғатилган. Ҳозирда тергов ҳаракатлари олиб борилмоқда.

Эслатиб ўтамиз, аввалроқ Жиззахда фуқарони ўқишга киритиб қўйиш учун 3000 доллар олган доцент ушлангани хабар қилинганди. Шунингдек, Андижонда фуқарони ўқишга киритиш учун 1,4 минг доллар олган университет ўқитувчиси ушлангани ва Бухорода қизни ўқишга киритиш учун 2 минг доллар олган шахс қўлга тушгани маълум қилинган.