Ўзбекистон-Тожикистон чегаралари хариталарда аниқ белгиланади
24-29 август кунлари Душанбе шаҳрида Тожикистон ва Ўзбекистон қўшма демаркация комиссияси йиғилиши доирасида икки давлат ҳукуматлари ишчи гуруҳлари ўртасида навбатдаги учрашув бўлиб ўтади. Бу ҳақда Азия Плюс ҳабар берди.
Музокаралар давомида давлатлар чегараларидаги демаркация чизиғи лойиҳаси ҳамда чегарада махсус белгилар жойлаштириш юзасидан фикр алмашилади.
Хабарда айтилишича, расмий Тошкент ва Душанбе ишчи гуруҳларга 2021 йил якунига қадар икки давлат ўртасида чергара тўсиқларини аниқ белгилаш тартибини тасдиқлаш борасида топшириқ берган. Ишчи гуруҳ таркибига картографлар, ТИВ ва чегара хизмати вакиллари кирган.
Ўзбекистон ва Тожикистон ўртасида 2019 йил давлат чегараларини делимитация қилиш якунланган. Томонлар ўшанда чегара чизиғи ўтишини ёзма равишда келишиб олган эди. Энди демаркация натижасида хариталарда давлат чегаралари аниқ кўрсатилади.
2018 йил 9-10 март кунлари Ўзбекистон Президенти Шавкат Мирзиёевнинг Душанбега ташрифи давомида ўзбек-тожик чегарасининг айрим участкалари ҳақида шартнома имзоланган эди.
Ўзбекистоннниг Тожикистон билан умумий чегараси 1332 километрни ташкил этади.
Жаҳонгир Қўзиев
