Ўзбекистонда кўпроқ қайси соҳа ходимлари мажбурий меҳнатга жалб қилингани маълум бўлди
Сенатда 18 август куни Одам савдосига ва мажбурий меҳнатга қарши курашиш миллий комиссиясининг навбатдаги йиғилишида 6 ой ичида кўпроқ қайси соҳа ходимлари мажбурий меҳнатга жалб қилингани айтилди.
Бу ҳақда Сенат ахборот хизмати хабар берди.
Маълум бўлишича, Меҳнат инспекцияси томонидан жойларда ходимларни ўз функционал вазифасига кирмайдиган ишларга жалб этиш бўйича 41 та ҳолат аниқланган. Соҳалар кесимида айтганда, мажбурий меҳнат ҳолатларининг аксарияти халқ таълими, банк-молия, тиббиёт, транспорт ва ободонлаштириш соҳаларида учраган.
Йиғилишда 2021 йилги пахта йиғим-терим мавсумида мажбурий меҳнатга йўл қўймаслик, меҳнат муносабатларини тўғри расмийлаштириш, теримчилар учун муносиб меҳнат ва дам олиш шароитларини яратиш борасида амалга оширилиши лозим бўлган масалалар ҳам муҳокама қилинган. Шунингдек, масалалар юзасидан Миллий комиссиянинг тегишли қарори қабул қилиниб, келгусидаги вазифалар белгилаб олинган.
