«Толибон» ҳаракати Афғонистон Ислом Амирлиги декларациясини эълон қилди
«Толибон» ҳаракати Афғонистон Мустақиллик куни муносабати билан декларация эълон қилди.
Бу ҳақда ҳаракатнинг расмий вакили Забиҳуллоҳ Мужоҳидга таяниб, «ТАСС» хабар берди.
У ўзининг Twitter тармоғидаги саҳифасида «Британия ҳукмронлигидан мустақилликнинг 102 йиллиги муносабати билан Афғонистон Ислом Амирлигининг эълон қилинганлиги» ҳақидаги ҳужжатнинг ҳаволасини жойлаштирган.
«Афғонлар ўз мамлакатининг бугун Америка истилосидан мустақил бўлиш арафасида эканидан фахрланади. Бу илоҳий неъматдир, бунинг учун барча афғонлар миннатдор бўлиши керак. Биз мамлакатимизда исломий тизим манфаатлари йўлида, шунингдек, қайта қуриш ва давлатнинг гуллаб-яшнаши учун бирдамлик ва самимийлик билан ишлашимиз керак», — дейилади ҳужжатда.
«Бундан бир юз икки йил олдин Афғонистон мужоҳидлари (озодлик курашчилари) саксон йиллик қаршилик натижасида Британия мустамлакачилигидан мустақилликка эришди. Бу асрнинг энг буюк ҳодисаси ҳисобланади», — дейилади «Толибон» ҳаракати баёнотида.
Аввалроқ «Толибон» ҳаракати биометрик маълумотларни аниқловчи техникани қўлга киритгани айтилганди. Шунингдек, «Толибон» ҳаракати Афғонистон келажакда қандай давлат бўлишини маълум қилган.
