Афғонистонда қолган ягона яҳудий: уни бу ерда нима ушлаб турибди?
Афғонистондаги яҳудийлар диаспораси анча йиллардан бери бир кишидан иборат.
Қолганлар мамлакатни аллақачон тарк этган.
Афғонистонда ҳокимият «Толибон» қўлига ўтгач, Звулун Симан-тов АҚШ ва Исроилдан мамлакатдан чиқиб кетишда ёрдам бериш бўйича ўнлаб таклифлар олди. Аммо эркак ҳар қандай ёрдамни рад этиб, Афғонистондаги ягона синагога ва яҳудийлар қабристонини ҳимоя қилишини билдирган.
Аммо Mokorrishon порталининг ёзишича, эркакнинг бу фидоийлиги фақат турмуш ўртоғи билан ажримга розилик бермасликдан иборат. Унинг рафиқаси ва қизлари аллақачон Исроилга кўчиб кетган.
Яҳудийларда никоҳни бекор қилиш жараёни диний қоидалар асосида амалга оширилади. Эрининг розилигисиз аёл ажрашган ҳисобланмайди. Гета, яъни ажрим хатисиз никоҳ сақланиб қолаверади: эркак ҳам, аёл ҳам янги оила қура олмайди.
Одатда гета ёзишдан бош тортган эркакларга раввинлар санкция эълон қилади. Аммо бундай вазиятда ҳеч бир раввин юрак ютиб Афғонистонга кела олмайди.
Симан-товага Кобулда ишлайдиган америкалик дипломатлар ҳам таъсир ўтказишга уринган, аммо эркак сўнгги кунигача Афғонистонда қолиш фикридан қайтмади.
Шарофат Маҳмудова
