Олий таълим вазирлиги Президент мажлисида вазир «ухлаб қолгани»га изоҳ берди
Шавкат Мирзиёевнинг 20 август куни тадбиркорлар билан ўтказган очиқ мулоқоти пайтида олий таълим вазири Абдуқодир Тошқулов «ухлаб қолгани» акс этган сурат тарқалганди.
Олий ва ўрта махсус таълим вазирлиги мазкур суратга изоҳ берди.
Қайд этилишича, ижтимоий тармоқда бугунги тадбиркорлар билан мулоқотда халқ таълими вазири давлат раҳбаридан кўрсатма олаётган пайтда унинг орқа фонида олий таълим вазири Абдуқодир Тошқуловнинг бошини эгган суратига «вазир уйқуда» тарзида изоҳ бериш бошланган.
«Фото доим ҳам ҳолатни тўлиқ ҳис қилиш имконини бермайди. Кадр билан ишлайдиганлар буни дарров тушунади. Суратни кўрибоқ вазир бошини эгиб ёзиб ўтирганлигини тушуниш қийин эмас.
Мутасаддилардан худди шу кадрни монтаждан холи ‘исходник материаллар’ олинди. Фактчекинг қилинганда вазир ухламаганлиги ўз тасдиғини топди. Марҳамат, видеода кўришингиз мумкин. Олий таълим вазири халқ таълими вазири Шерзод Шерматовга топшириқ берилаётганда ён дафтарига қайдлар қилиш билан банд.
Текширилмаган, шубҳаларга асосланган ахборот тарқатиш — энг камида касбий этикага зид.
Шу ўринда, фуқароларга, хусусан, ҳукумат аъзосига туҳмат қилиш учун жавобгарлик белгиланганлигини эслатамиз», дейилади вазирлик изоҳида.
Аввалроқ журналист Азиза Қурбонова мазкур сурат юзасидан фикрларини билдириб, ўша вазиятдан олинган видеони эълон қилганди. Маълум бўлишича, вазир аслида ухламаётган бўлган. Халқ таълими вазири Шерзод Шерматов Президентдан топшириқ олаётганда Абдуқодир Тошқулов бошини эгиб, қайд дафтарига маълумот киритаётган пайт суратда ухлаётгандек таассурот уйғотган.
