Қиролича Елизавета II шаҳзода Гарри ва унинг рафиқасини судга беришга қарор қилди
Буюк Британия қироличаси Елизавета II қироллик оиласига «қайта-қайта ҳужум қилган» шаҳзода Гарри ва унинг рафиқаси Меган Марклга қарши курашиш учун адвокатлар гуруҳини ёллади. Бу ҳақда «The Sun» хабар берди.
Нашрнинг маълум қилишича, қиролича судга боришга тайёр, лекин қариндошлари ўзларига келиб, можарони тугатишига умид қилмоқда.
«Улар бунга қанчалик даражада тоқат қила олиши бўйича маълум чегара бор. Қиролича ва унинг оиласи қариндошлари томонидан аллақачон кўплаб ҳужумларга учраган, Гарри ва Меган такрорий ҳужумлар қабул қилиниши мумкин эмаслигини яхши билади», — деган қироллик манбаси ва ҳозирда адвокатлар туҳмат бўйича экспертлар билан маслаҳатлашаётганини маълум қилган.
Қайд этилишича, адвокатлар шаҳзода Гаррининг «у туғилган шаҳзода сифатида эмас, балки у бўлиб қолган одам сифатида» ёзган хотираларини нашр этишга тайёр бўлган «Penguin Random House» компаниясига огоҳлантириш юборишни режалаштирмоқда.
Маълумот учун, 2021 йил июль ойи бошида шаҳзода Гарри «Penguin Random House» билан ўз хотираларини нашр этишга келишгани ва катта миқдорда аванс олгани ҳақида хабар берган. Қироллик биографи Ангела Левин китоб малика Диананинг ўлимига бағишланишини таъкидлаган.
