Тожикистондан Панжшер вилоятига ҳарбий қуроллар олиб ўтилганми?
Афғонистоннинг Панжшер вилоятидаги миллий қаршилик кучларининг Тожикистон билан ҳаво алоқаси борлиги рад этилди.
Бу ҳақда «Sputnik Тожикистон» хабар берди.
Таъкидланишича, Панжшердаги қаршилик кучлари ҳали бошқа давлатлар билан ҳаво алоқасини ўрнатмаган. «Тожикистоннинг Панжшер билан ҳаво кўприги йўқ», — деган нашрнинг Панжшердаги манбаси. Қайд этилишича, «Толибон» ҳаракати жангарилари Панжшер вилоятини ўраб олган. Мазкур ҳудуд айни вақтда ҳаракат томонидан босиб олинмаган ягона вилоят ҳисобланади.
Маълум бўлишича, «Толибон» ҳаракати ҳозирда республика раҳбари вазифасини ўз зиммасига олган Афғонистон вице-президенти Амрулла Солиҳ билан Панжшир вилоятидаги вазиятни тинч йўл билан ҳал қилиш бўйича музокара олиб борган.
Аввалроқ Тожикистондан Панжшер вилоятига ҳарбий қуроллар олиб ўтилгани айтилганди. Шунингдек, Тожикистонда афғон қочқинлари учун қурилаётган лагер ҳақида маълумот берилган.
