Жазоир Марокаш Қироллиги билан дипломатик алоқаларни узди
Жазоир "душманлик ҳаракатлари" туфайли Марокаш Қироллиги билан дипломатик алоқаларни узди, деди Жазоир ташқи ишлар вазири Рамтан Ламамра. Бу ҳақда “Reuters” хабар тарқатган.
"Марокаш Қироллиги Жазоирга қарши душманлик ҳаракатларини мунтазам давом эттириб келмоқда", деди Ламамра миллий телевидение матбуот анжуманида.
Ламамранинг айтишича, ҳар икки мамлакатдаги консуллик хизмати ўз фаолиятини давом эттиради.
Маълумки, Жазоир Олий Хавфсизлик Кенгаши мамлакатнинг тоғли ҳудудида рўй берган кучли ўрмон ёнғинлари сабабли қўшни давлат билан муносабатларни қайта кўриб чиққан. Жазоир расмийлари ўрмон ёнғинларида марокашликларнинг қўли бор, деб ҳисоблайди.
Марокаш ва Жазоир ўртасидаги муносабатлар сўнгги йилларда тобора кескинлашиб бормоқда. Бунга Ғарбий Саҳара ҳудудига эгалик қилиш масаласи сабаб бўлган. Икки давлат ўртасидаги қуруқлик чегараси 1994 йилдан бери ёпиқ.
Насиба Тўхтаева
