Эндиликда суғурта шартномалари фақат давлат тилида тузилади
Олий Мажлис Сенатининг ўн саккизинчи ялпи мажлисида “Суғурта фаолияти тўғрисида”ги қонун муҳокама қилинди.
Мазкур қонунда суғурта бозорининг профессионал иштирокчилари (суғурта ташкилотлари, суғурта брокерлари, аджастерлар, ассистанслар, актуарийлар, сюрвейерлар) ҳуқуқ ва мажбуриятлари аниқ белгиланди.
Қолаверса, суғурта шартномаларини электрон тарзда интернет орқали тузиш жараёни қонун билан мустаҳкамланади. Яна бир муҳим жиҳатлардан бири, қонун билан эндиликда, суғурта шартномаларининг фақат давлат тилида тузилиши белгиланмоқда.
Умуман олганда, қонун соҳадаги кўплаб вазифаларни ҳал этишга қаратилмоқда. Жумладан, ушбу қонун билан суғурта бозори профессионал иштирокчилари фаолиятини жонлантириш, шунингдек, умумий суғурта бозори профессионал иштирокчиларининг ролини ошириш орқали суғурта бозори инфратузилмасини ривожлантириш ва кенгайтириш, суғурта хизматлари истеъмолчилари ва суғурта фаолиятининг бошқа субъектлари ҳуқуқлари ҳимоясини мустаҳкамлаш, аҳолининг бу борадаги саводхонлиги ва ишончини ошириш, суғурта бозорининг очиқлиги ва ошкоралигини таъминлаш каби масалалар камраб олинган.
Қонун сенаторлар томонидан маъқулланди.
Эслатиб ўтамиз, аввалроқ вазирлик ва қўмиталарнинг алоқа операторлари асосан русий забонда сўзлаши ҳақида ёзгандик.
Баҳринисо МАДУМАРОВА
