Эрондаги қамоқхоналарнинг бирида маҳбуслар таҳқирлангани акс этган тасвирлар тарқалди
Эрон қамоқхона хизмати бошлиғи Теҳроннинг Эвин қамоқхонасида ҳибсга олинганлар ҳақорат қилингани акс этган видеолар юзасидан кечирим сўради.
Бу ҳақда «BBC» хабар берди.
Қайд этилишича, хакерлар қўриқчилар маҳбусларни калтаклаб, полга судраб бораётгани акс этган камера тасвирларини тармоққа жойлаган. Бу воқеадан кейин мамлакат қамоқхоналар ташкилоти раҳбари Муҳаммад Меҳди Ҳаж-Муҳаммадий «қабул қилиб бўлмайдиган хатти-ҳаракатлар» учун жавобгарликни ўз зиммасига олишини маълум қилган.
Мазкур қамоқхонада кўплаб сиёсий маҳбуслар ва чет эл фуқаролари сақланади. Таъкидланишича, ошкор қилинган видеолар Эрон қамоқхоналаридаги ўнлаб йиллар давомида ёмон муомала ва ҳақоратлар ҳақидаги хабарларни тасдиқлайди. Собиқ сиёсий маҳбуслар олдиндан ҳукуматни жинсий, жисмоний ва руҳий қийноқларни мунтазам равишда ишлатишда айблайди. Эрон ҳукумати эса буларни доим рад этиб келади.
Айтилишича, Ҳаж-Муҳаммадий видеода кўрсатилган ҳуқуқбузарликлар учун халқдан кечирим сўраган. «Мен бундай номақбул хатти-ҳаракатлар учун жавобгарликни ўз зиммамга оламан ва бу аччиқ воқеаларнинг такрорланишига йўл қўймасликка ва жиноятчилар билан жиддий курашишга ваъда бераман», деб ёзган у ўзининг Twitter саҳифасида.
Аввалроқ, Қашқадарёдаги қамоқхонада 19 ёшли йигит ўз жонига қасд қилганлиги ҳолати юзасидан Қарши махсус прокурори ходимларга нисбатан иш қўзғатганлиги ва тергов ҳаракатлари бошланганлиги ҳақида хабар берилганди.
