“Янги Ўзбекистон” боғи атрофидаги кўчаларда транспорт воситалари ҳаракати чекланади
2021 йил 31 август ҳамда 1-2 сентябрь кунлари Қибрай туманида барпо этилган “Янги Ўзбекистон” боғи атрофидаги кўчаларда транспорт воситалари ҳаракати чекланиши мумкин.
Бу ҳақда Йўл ҳаракати хавфсизлиги Бош бошқармаси хабар берди.
Бунга сабаб ҳудудда барпо этилган “Янги Ўзбекистон” боғида Мустақиллигимизнинг 30 йиллиги муносабати билан байрам тадбирлари ташкил этилиши режалаштирилган. Шунинг учун Темур Малик ҳамда Оҳангарон шоҳ кўчалари кесишмасидан бошлаб “Махтумқули-Истиқлол” автомобиль йўли бўйлаб 4Р-12 “Бектемир-Чорбоғ” автомобиль йўлигача бўлган масофада транспорт воситалари ҳаракати чекланиши мумкин.
Тирбандликларни олдини олиш мақсадида ҳайдовчиларга бошқа айланма йўллардан фойдаланишлари тавсия этилади. Барча ҳайдовчилардан байрам тадбирлари вақтида тартибга солувчиларнинг ишоралари ҳамда йўл белгилари талабларига риоя қилишларини сўраймиз, дейилган хабарда.
