Ўзбекистон мустақиллигининг 30 йиллиги шарафига Малайзия пойтахти Ўзбекистон байроғи рангларида ёритилади
Ўзбекистон мустақиллигининг 30 йиллиги шарафига мамлакатнинг Малайзиядаги элчихонаси байрам акцияси ўтказади, деб хабар бермоқда «Дунё» АА.
Унга кўра, ушбу санани нишонлаш доирасида Малайзия пойтахтининг қуйидаги рамзий диққатга сазовор жойлари Ўзбекистон давлат байроғи рангларида ёритилади:
- Saloma Link пиёдалар кўприги;
- пойтахт мерияси кўп қаватли биноси;
- машҳур эгизак бинолар — Petronas Twin Towers жойлашган марказий чорраҳа.
Ўзбекистоннинг Малайзиядаги элчихонаси Куала-Лумпурдаги барча ўзбекистонликларни ушбу ҳолатга гувоҳ бўлишга, эсдалик учун суратга тушишга чақирган. Шу билан бирга, эҳтиёт чораларини кўришга, карантин қоидаларига амал қилишга чақирган.
Аввалроқ Ўзбекистон мустақиллигининг 30 йиллиги шарафига Ниагара шаршараси 15 дақиқа давомида мамлакат байроғи рангларида ёритилиши ҳақида хабар берилган эди.
Эслатиб ўтамиз, 2020 йилда Ўзбекистон мустақиллигининг 29 йиллиги муносабати билан Бирлашган Араб Амирликларининг Дубай шаҳрида жойлашган дунёнинг энг баланд иморати Бурж Халифада Ўзбекистон байроғи 1 сентябрь куни 1 дақиқа давомида намойиш этилганди.
