Туркия Президенти мамлакатимиз етакчиси ва барча ўзбекистонликларни Мустақиллик куни билан табриклади

 

 

Суҳбат аввалида Туркия раҳбари давлатимиз раҳбари ва Ўзбекистоннинг кўп миллатли халқини юртимиз мустақиллигининг 30-йиллиги билан самимий қутлади. Дўст Туркия халқи номидан Ўзбекистонга тинчлик-осойишталик, фаровонлик ва равнақ тилакларини изҳор этди.

 

Президентлар икки томонлама ҳамкорлик кун тартиби юзасидан фикр алмашдилар.

 

Жорий йил бошидан ўзаро савдо кўрсаткичлари икки баробар ўсгани ва 240 дан ортиқ қўшма корхона ташкил этилгани мамнуният билан қайд этилди.

 

Мамлакатларимиз етакчи компанияларининг кооперацияси кучайиб бормоқда, жумладан, энергетика, саноат, қишлоқ хўжалиги, инфратузилма, туризм ва бошқа соҳаларда муҳим инвестиция лойиҳалари амалга оширилмоқда.

 

Қўшма таълим ва маданий-гуманитар дастурлар муваффақиятли жорий қилинмоқда. Хусусан, шу йилнинг август ойида туркиялик етакчи мутахассислар Тошкент ва Самарқанд шаҳарларидаги архитектура-қурилиш институтларига раҳбар бўлдилар.

 

Етакчилар бўлажак олий даражадаги тадбирлар режасини, шу жумладан Стратегик ҳамкорлик кенгашининг навбатдаги йиғилишига тайёргарлик масалаларини кўриб чиқдилар.

 

Афғонистондаги ҳарбий-сиёсий аҳвол кескинлашиши таъсирида минтақадаги вазиятнинг ривожланишига алоҳида эътибор қаратилди. Минтақавий хавфсизлик ва барқарорликни таъминлаш масалалари юзасидан алоқалар ва кўп томонлама мулоқотни давом эттириш муҳим экани таъкидланди.

 

Аввалроқ Президент Шавкат Мирзиёев 1 сентябрь куни Бирлашган Араб Амирликлари Вице-президенти, Бош вазири, Дубай Амирлиги ҳокими Муҳаммад бин Рошид Ол Мактум билан телефон орқали мулоқот қилгани ҳамда Ўзбекистон Республикаси мустақиллигининг 30 йиллиги муносабати билан Президент Шавкат Мирзиёев номига хорижий давлатлар ва ҳукуматлар, нуфузли халқаро ташкилотлар раҳбарлари, таниқли жамоат ва дин арбобларидан самимий қутловлар келаётгани тўғрисида хабар бергандик.