Туркманистон мактабларида ўқув йили октябрдан бошланадиган бўлди
Туркманистонда юқумли касалликларнинг олдини олиш мақсадида мактабларда ўқув йилини бошлаш 1 октябрга қолдирилди. Шу билан бирга, мамлакатда COVID-19 юқтириш ҳолати расман қайд этилмаган.
Ашхободдаги бир қатор мактаблар ўқитувчиларининг маълум қилишича, бугун, 1 сентябрь куни мактабларда фақат биринчи синф ўқувчилари учун тантанали сафда туриш тадбирлари ўтказилган.
Ўқитувчилар, шунингдек, таълим муассасаларига фақат биринчи синфдан олтинчи синфгача бўлган ўқувчилар таклиф этилганини хабар қилди. Улар шу ҳафтанинг охиригача ўқийди, сўнг 1 октябрга қадар таътилга кетади. Еттинчи–ўн биринчи синф ўқувчилари ўқишни бирйўла 1 октябрдан бошлайди.
Мамлакатнинг ўрта махсус ва олий ўқув юртлари талабаларига ўқиш қачон бошланиши ҳақида уларга кейинроқ хабар берилади, дейилади хабарда.
