Японияда Moderna вакцинасидан топилган ёт моддалар зангламайдиган пўлат бўлиб чиқди
Японияда Американинг коронавирусга қарши Moderna вакциналаридан топилган ёт модда зангламайдиган пўлат зарралари бўлиб чиқди. Бу ҳақда Moderna компанияси ва вакцинани мамлакатда тарқатишга маъсул Япониянинг Takeda компанияси қўшма баёнотида айтилган.
Препарат Takeda компанияси томонидан текширувдан ўтказилди. Текширув натижаларидан маълум бўлишича, «ишлаб чиқариш ускуналарини йиғиш вақтидаги носозлик туфайли зангламайдиган пўлат зарралари вакцинага аралашиб кетган».
Қўшма баёнотда таъкидланишича, зангламайдиган пўлатдан юрак клапанлари, сунъий бўғинлар, металл чоклар ва бириктирувчи қисқичда фойдаланилади, шунинг учун унинг зарраларини танага юбориш катта хавф туғдирмайди.
Аммо, шунга қарамай, Япония Соғлиқни сақлаш вазирлиги маълумотларига кўра, эҳтиёт чораси сифатида мамлакатда Moderna вакцинасининг бир нечта партиясини қўллаш тўхтатилган.
Август ойининг охирида Японияда Moderna вакцинаси партияларидан бирида ёт моддалар аниқланди — очилмаган 39 та ампулада катталиги бир неча миллиметрдан ошмайдиган қора заррачалар топилган. Ўша вақтга келиб, ярим миллионгача одам ушбу партиядаги вакциналар билан эмланган бўлиши мумкин. Улардан икки нафари инъекциядан кўп ўтмай вафот этди, аммо уларнинг ўлими билан эмлаш ўртасида ҳеч қандай боғлиқлик аниқланмаган. Шу билан бирга расмий тергов давом этмоқда.
Ҳодиса туфайли Япония Соғлиқни сақлаш вазирлиги хавфсизлик юзасидан мамлакатга Испаниянинг Rovi SA фармацевтика компанияси корхоналаридан учта партияда келиб тушган 1,63 миллион доза Moderna вакцинасидан фойдаланишни тўхтатди. Учта партиянинг барчаси битта ишлаб чиқариш линиясида деярли бир вақтнинг ўзида тайёрланган. Японияга етказиб берилгач, улар 863 та вакцинация марказига тарқатилган. Ёт зарралар топилгани учун ушбу марказларга қўшимча дозада вакциналар етказилади.
