АҚШ космик компанияси парвозларини вақтинча тўхтатди

 

 

Қайд этилишича, бу қарор "Бирлик" космик кемасининг жорий йил 11 июль куни парвоз пайтида режалаштирилган йўналишдан четга чиқиши билан боғлиқ.

 

"Virgin Galactic, ФАБ воқеа терговининг якуний ҳисоботини тасдиқламагунча ёки асосий сабаблар жамоат хавфсизлигига таъсир қилмаслигини аниқламагунча "SpaceShipTwo"да учишни давом эттира олмайди", дейилади хабарда.

 

Таъкидланишича, учиш пайтида "Unity" ракета самолёти экипажи берилган траекториядан четга чиқгани тўғрисида автоматик огоҳлантириш олган. Самолёт ташувчисидан ажралиб чиққанидан сўнг у бир мунча вақт унга ажратилган ҳаво йўлагини тарк этган.

 

"Virgin Galactic" қоидаларига кўра, бундай огоҳлантириш парвозни тўхтатишга олиб келиши керак. Аммо бу содир бўлмади ва ракета самолёти тахминан 85 километр баландликка муваффақиятли кўтарилди ҳамда ортга қайтди.

 

"Virgin Galactic" йўналишдаги бурилишларни кутилмаган кучли шамоллар билан изоҳлади.

 

"Парвоз йўли бизнинг дастлабки режамиздан фарқ қилса-да, "Unity" космосга муваффақиятли етиб келди. Назоратни сақлаб, белгиланган маршрут бўйича ҳаракат қилиб, Нью-Мексико космодромига хавфсиз қўнди. Бу траекториядаги ўзгаришлар йўловчилар ва экипажни хавф остига қўймади", — дейилади компания хабарида.

 

Бироқ ФАБ бу ғайритабиий вазиятни текширишга қарор қилди. Шу сабабли, "Virgin Galactic" рейслари тўхтатилди. Бу компаниянинг сентябрь охири октябрь бошига режалаштирган навбатдаги космик миссияси қолдирилиши мумкин.

 

Эслатиб ўтамиз, "Virgin Galactic" космик кемаси Ер орбитасига чиқмасдан космосга қисқа сайёҳлик парвозлари учун мўлжалланган. "Unity" ракета самолёти "SpaceShipTwo" ташувчи самолёти томонидан тахминан 15 километр баландликка кўтарилади. Шундан сўнг у ўз ракета двигателини ажратади. Сайёҳлар учун рейс нархи 450 минг долларни ташкил этади.

 

 

Насиба Тўхтаева