Пентагон Панжшер масаласига аниқ жавоб бермади

 

 

Кирби журналистлардан бирининг Панжшердаги қаршилик кучларига АҚШ ёрдам берадими деган саволга “АҚШнинг Афғонистондаги ҳарбий миссияси якунланди” - деган жавоб берди. Толибларга қарши авиазарбалар ёрдамида қаршилик кучлари қўллаб-қувватланиши ҳақида сўралганда ҳам амалдор юқоридаги жавобни қайтарган.

 

Ўз навбатида журналист Пентагоннинг Афғонистондаги террорчилар марраларига авиазарбалар бериш ҳақидаги баёнотини эслатиб ўтди. Шу нуқтаи назардан АҚШ ҳарбий миссияси давом этмоқда. “Биз миллий манфаатларимизга ва АҚШ ҳудудига таҳдидларни олдини олиш мақсадида масофавий террорчиларга зарба бериш имкониятини сақлаб қоламиз. Лекин бу Вашингтон ҳарбий миссияси давом этишини англатмайди”, - деб жавоб берган Кирби.

 

Кирбидан унинг сўзлари “АҚШ Панжшердаги қаршилик кучларига ёрдам беришга ҳаракат қилмаслигини англатадими”, дея сўралганда “Биз террор таҳдиди қаршисида дунёнинг исталган нуқтасида манфаатларимизни ҳимоя қилишда давом этамиз”, - деб аниқ жавобдан қочган.

 

Оқ Уй матбуот котиби Жен Псакига ҳам Вашингтоннинг Панжшер билан алоқалари мавжудлиги ҳақида савол берилган. Бунга жавобан “Мен бизнинг улар билан алоқаларимиз ҳақида ҳеч нарса дея олмайман”, - деб айтган.

 

“Толибон” 2021 йил август ойида Афғонистон вилоятларига ҳужумларини кучайтирди. 15 август куни ҳаракат Кобул шаҳрини жангсиз эгаллади. Толиблар  ҳукумат тузиш ишларини олиб бормоқда. Фақатгина Панжшер вилояти “Толибон” томонидан эгалланмаган. Вилоятда Аҳмад Масъуд бошчилигида Қаршилик фронти тузилган. Ҳозирда Панжшерда толиблар ва Масъуд кучлари ўртасида жанглар давом этмоқда.

 

 

Жаҳонгир Қўзиев