Коронавирусга қарши эмланишдан сўнг ножўя таъсирлар ёки ўлим ҳолати кузатилиши мумкин
Сўнгги кунларда, ижтимоий тармоқларда коронавирусга қарши эмланишнинг салбий оқибатларига оид кўплаб видеолар тарқалди.
Хусусан, Хоразмлик аёлнинг кўриш қобилиятидан айрилгани айтилса, Наманганлик аёл вакцинациядан сўнг шол бўлиб қолганига оид видеолар кенг муҳокамаларга сабаб бўлди. Шу турдаги яна бир мурожаатда Тошкент вилояти Ўрта Чирчиқ туманида яшовчи аёл T.Қ. фарзанди С.Қ.нинг тиббий кўрикдан ўтказилмасдан эмлангани, натижада аҳволи оғирлашиб вафот этгани ҳақида айтади.
Коронавирусга қарши курашиш штаби аъзоси, Севара Убайдуллаева охирги кунларда вакцинациядан кейинги ўлим ҳолатлари кузатилишига оид урчиган саволларга жавоб берди.
Мутахассиснинг сўзларига кўра, вакцинадан кейин ножўя таъсирлар ёки ўлим ҳолати кузатилиши мумкин. Бу ҳақда вакцина ишлаб чиқувчилар томонидан йўриқномада ёзилган. Бироқ вакцинадан сўнг кузатиладиган ўлим ҳолати эмлашдан кейинги 1 соат оралиғида содир бўлади.
Севара Убайдуллаева “Ўтиб кетувчи ножўя таъсирлар эса, вакцина олгандан кейинги 3 кунлик давомида кузатилиши мумкин, лекин улар кейин ўтиб кетади. Шуни унутмаслик керакки, бундай ҳолатлар инсон организмининг индивидуал хусусиятидан келиб чиқиб кузатилади”, - дея маълум қилди.
Ўз навбатида соғлиқни сақлаш вазирлиги турли ножўя оқибатлар келиб чиқмаслиги учун вакцина олгандан кейинги кунларда саломатликка ҳар доимгиданда кўра кўпроқ эътиборли бўлишни тавсия қилмоқда.
